«Қазпошта» 2025 жылдың қорытындысын шығарды. Жиынтық табыс 25%-дан астам өсті

2025 жылдың қорытындысы бойынша «Қазпошта» АҚ-ның жиынтық табысы 133,6 млрд теңге болды. Бұл өткен жылмен салыстырғанда 25%-ға артық. 2024 жылы бұл көрсеткіш 106,6 млрд теңге болған. Бұл пошта операторының логистикалық, қаржылық және e-commerce қызметтеріне сұраныстың тұрақты екенін көрсетеді.

Осылайша, компанияның жыл қорытындысы бойынша таза табысы 245 млн теңгеден асты. Пошта операторы әлеуметтік тұрғыдан тиімсіз бағыттарда да қызмет көрсетуді жалғастырып келеді. Бүгінде Қазпошта аудан орталықтары мен ауылдық бөлімшелер арасында 1000-нан астам бағыт бойынша қызмет көрсетеді.

Бұл бағыттарда жөнелтілімдер аптасына кемінде екі рет жеткізіледі. Сондай-ақ, 2025 жылы нысандарды жөндеу мен автопаркті жаңартуға шамамен 2,6 млрд теңге бөлінді. Инвестициялар логистикалық инфрақұрылымды жаңғыртуға және желіні жаңартуға жұмсалды. Қазіргі таңда Қазпошта бір мезетте бірнеше бағытты дамытуда.

Атап айтқанда: логистика, e-commerce және қаржылық сервистер. Компания маркетплейстермен ынтымақтастықты кеңейтіп, қызметтерді цифрландыруды жалғастырып жатыр.